Atzo, Apirilak 18, Garagardo Ahotsa blogaren III. urteurrena izan zen. Hirugarren urte honetan ere garagardoaren inguruko kontu asko elkarbanatu ditugu zuekin. Aurtengo sarrera aipagarrienen errepasoa duzue hemen:

Lehengaien atalean lupulu barietate zein malta mota berriak ikusi ditugu. Galaxy, Centennial, Chinook eta Motueka lupuluak alde batetik, eta gari malta, malta marroia eta malta beltza bestetik.

Garagardo estilo gehiago aurkeztu ditugu; Porter, Amerikar IPA eta Amerikar Ale gorria.

Euskal Herrian sortu diren artisau garagardo proiektu desberdinen berri eman dugu: Olañeta, Gross, Zerb… besteak beste.

Bertako ekoizleez gain, Ingalaterrako enpresa desberdinak ere izan ditugu gure artean: Meantime, Redchurch, The Foundry, Moncada. Ezin ahaztuko dugu baita Truman´s enpresako garagardogileekin izandako elkarrizketa.

Garagardo ekoizleak oso garrantzitsuak dira blogarentzat, baina baita gure inguruan garagardo interesgarriak eskaintzen dituzten taberna eta dendak ere. Horregatik, Iruñako Manneken Beer tabernak 9 garagardo grifo  jarri zituela kontatu genizuen, Irungo Boulevard tabernak beraien ekintzen artean antolatutako To ol garagardoen dastaketa– ren berri eman dugu. Donostiako Never-Stop tabernan ospatu behar zen Basqueland Brewing Project proiektuaren garagardo berrien aurkezpena zein Manneken Beer-en Nogne ekoizlearen bisitaren berri eman genuen, Beasaingo Hiruki tabernak bertako artisau garagardoen alde eginiko apustuaren berri eman dugu. Garagardo dendei dagokienez, Donostiako “El Txoko de las Cervezas” izan dugu.

Urtean zehar izan ditugun garagardo jaialdi desberdinen bozgorailuetako bat izan gara: Donostiako “Mikro Brew Festival”, Bilboko “Beerbaofest”, “Antxobeerfest”…

Garagardo munduaren inguruko berri desberdinak elkarbanatu ditugu: Koka landareaz eginiko garagardoarena, etxean garagardoa egiteko lupulu.com webguneak eskainitako errezeta berriak, Ingalaterrako garagardo denda baten almazenetan eginiko 16000 Brewdog botilen lapurreta, Localbier.com artisau garagardo bilatzailearen sorrera, bilatzaile honek partaidetza irekiaz eginiko erabakiak, The Indezents-ek Localbier-i eginiko aurkezpen bideoa.

Idatzizko informazioa emateaz gain, Ikus-entzunezko formatuan Sam eta Julio garagardo ekoizleen elkarrizketak ikusi ditugu.

Akorde zaporea atalean Urriko Mozkorrak eta Freaky Festa abestiak entzun ditugu. Kantuz ere, baina beertsotan aritu da  gure lagun Garikoitz garagardoaren lehengai eta hartzidurari buruz.

Bitxikeriak oso gustuko ditugu eta lagunentzat artisau garagardoa ordainduta uzteko hedatzen hasi den joera, zein garagardoa tabernatik etxera eramatekoarena ezagutu ditugu.

Etxean edateko ditudan garagardoak zein diren “aste honetan hozkailuan dudana” atalean erakutsi dut noizbeinka eta 2013.urtean gustura edandako garagardoen inguruan ere labur-labur aritu.

Garagardo munduarekiko dugun frikismo hau bloga baina harago doa, eta artisau garagardoaren mugimenduak interes pixka bat sortu duela hedabideetan dirudi eta honen inguruan ETB1-eko Airean zein irratiko Faktoria saioetan parte hartzeko aukera izan dugu. Gaitz honek Londresen ospatu den gluten gabeko garagardo txapelketan epaimahi bezala parte hartzeko aukera eman digu.

Hau guztia, zuekin eta EUSKARAZ elkarbanatu dugu!

Zuengatik, artisau garagardo mugimenduagatik, eta bereziki atzo urteak bete zituen nire anaia Enekorengatik…

TOPA!!!

Joan den Martxoan ospatu zen Londresen FreeFrom Food Awards 2014 lehiaketako sari banaketa eta gluten gabeko garagardoen ataleko irabazleak nortzuk izan ziren jakigo dugu gaur hurrengo lerroetan:

1.- IRABAZLEA:

– Green´s India Pale Ale %5 alk. bol.

 Jatorrian glutenik gabeko lehengaiez ekoiztutako garagardo bat da, garagar maltarik erabili gabe ekoiztua (beste gluten gabeko garagardo batzuei glutena behin garagardoa ekoiztu ondoren kentzen zaie).

2.- OSO GOMENDAGARRIA

Irabazleaz gain, hurrengo bi garagardoak “oso gomendagarria” bezala sailkatu ziren:

– CELIA Organic Gluten-Free Lager       – Estrella DAURA Damm

3.- GOMENDAGARRIA

– Green´s Premium Pilsner              – St. Peter´s Brewery G-Free

Londresen ospatu zen lehiaketa honetan epaimahai bezala parte hartzeko aukera izan genuen eta pertsonalki Green´s IPA eta Celia Organic Gluten-Free Lager garagardoek asko eta oso positiboki  harritu nindutela esan beharra daukat.

Lehenengoa IPA klasiko oso orekatu eta atsegin bat, garagar maltarik gabe ekoiztua! Sekula ez nuen asmatuko garagar maltarik erabili gabe ekoiztua izan dela. Eta bigarrena, Celia-ren gluten gabeko garagardoa, Pilsner benetan atsegina, orekatua eta garbia. Hau gluten gabeko garagardo bat denik ere ez nuen pentsako jakin gabe.

– Epa! Kañeroan daukazuen The Kernell-en IPA garagardo bat nahiko nuke etxera eramateko.

– Ez daukagu plastikozko edalontzirik – erantzun zuen tabernariak.

– Ez du axola, nire edalontzia ekarri dut etxetik. Hemen jarriko al didazu?

– Ah bueno…orduan bai… – erantzuten du harridura aurpegiaz.

Elkarrizketa antzekoa behin baino gehiagotan eman zen Londresen nire etxe ondoko Pub batetako tabernariek nire ohitura ezagutu zuten arte.

Horrelaxe egin izan dut askotan bai, etxetik edalontzi bat hartu eta etxe ondoko Pub-era aste horretan kañeroan zuten garagardo berezia etxera eramateko joan izan naiz. Arrazoiak? Kalitatezko garagardo “fresko” bat (ez 6 hilabete botila batetan daraman bat…) nahi dut eta momentu horretan etxean edan nahi dut…

Ba, ez edalontzietan baina antzekoa pentsatzen duten garagardozale ugari dagoela dirudi E.E.B.B-tan. “Growler” bezala ezagutzen diren botila batzuk erabiltzen dituzte kasu honetan toki desberdinetan kupeleko garagardoa etxera eramateko.

Mota desberdinetako “Growler” botilak aurki ditzakegu baina kontzeptua berdina da. Botila taberna edo garagardo fabrika batean bete eta “etxera” eramaten duzu. Behin hustutakoan, ongi garbitu eta berriz bete dezakezu beste egun batetan.

E.E.B.B.-tan fenomeno honek hartu duen garrantzia hain da handia, zein 2013. urtean  Kalifornia, Arizona eta Georgia bezalako estatuek besteak beste, lege aldetik salerosketa mota honen inguruko debeku edo zailtasunak murriztu dituzten.

Garagardoa erosteko modu hau aukeratzen duten garagardozale askok antzeko arrazoiak dituzte: garagardo freskoa, bertakoa eta botilekin alderatuz lortzen duten prezio bajuagoak.

Argazkiak: www.azcentral.com eta www.bottless.net

Joan den ostegunean Euskadi Irratiko Faktoria saioan garagardoaren inguruko kontuez solasean egin genuen eta hementxe duzue audioa: