Garalotzari erabilpen berriak ematen…

2012(e)ko urriak 24-n igor-kargitaratuta

Aurreko batean garalotza zer den ikusi genuen. Gaurkoan, garagardo enpresa desberdinek garalotza hondakin bezala kudeatu ordez, zein beste erabilpen ematen dioten ikusiko dugu. Azaltzen diren kasuek gaur egungo egoera isladatzen dute nolabait.

Animalien elikagai bezala erabiltzea da gehien hedatua dagoen praktika. Txerri, oilo, asto etab. bezalako animaliek oso gustura jaten dute garalotza, horregatik, garagardo ekoizle askok baserri edo animaliak dituen nekazari batekin egiten du tratua ekoizpenean sorturiko garalotza jaso eta beraien animaliei eramateko. Baserritarrak dohako elikagaia lortzen du hala bere animalientzat eta garagardo ekoizleak ez du zertan kezkatu garalotzarekin.

Coloradon dagoen Arvada Beer Company enpresak txakurrentzat gailetak egiten dituen enpresa bati ematen dio garalotza.

Coloradon baita dagoen The Fort Collins Brewery enpresak beraien taberna batetan ogia egiten du beraien garagardo mota baten garalotza erabilita.

Konpostaturiko garalotza ere lur sailak zein belardi desberdinak ontzeko erabiltzen da. Reuben´s Brews-ek adibidez produktu organikoak ekoizten dituen elkarte bati ematen dio garalotza, hauek perretxikoak hazteko erabiltzen dute, nitrato eta sulfato kopuru handia baitu.

Eta bukatzeko, baina ez horregatik aukera txarrena, garalotza energia iturri bezala erabiltzen den kasua dugu. Lurrina ekoizteko biomasa (garalotza kasu honetan) erregai bezala erabiltzen duen lurrin makina garatu du Alascan Brewing Company enpresak. Honela, “ekoizpen prozesuan behar den lurrinaren erdia baino gehiago ekoizteko aukera ematen digu” dio enpresa honetako Ashley Johnston-ek.

Hauek dira ba garalotza modu sostengarrian kudeatzeko gaur egun dauden praktikak.

Garagardoa aireportuan fakturatzen…

2012(e)ko urriak 23-n igor-kargitaratuta

Asteburua Beasainen pasa dut eta larunbatean elkartean afaria genuenez, Londrestik garagardoa eramatea pentsatu nuen. Bost litrotako hiru lata handi (garizkoa, amerikar IPA eta beltza) eta 5 botila.

Motxila bat eta fakturatu behar nuen maleta bat eraman nituen, bigarren honetan sartu nuen garagardo guztia. Fakturatzeko tokira iretsi eta maletak 24 kg pisatzen zituela ikusi nuen (20 kg zen gehienez eraman ziteeken pisua)!! Maletan nuen arropa gutxia kendu nuen eta… 23 kg!! Garagardo botilak kendu nituen iada besterik egiterik ez nuenez ….eta… 19,9 kg!! Nahiz eta botilak nirekin eramateko aukerarik ez izan, 15 litro neramatzala pentsatzen kontsolatu nuen nire burua. Bitartean hori bai, hegazkina hartu aurretik botilaren bat edan beharko nuela pentsatzen nebilen.

Fakturatzean niri kasu egiten ari zitzaidan emakumeak fakturatuta dagoela dioen pegatina jarri zion maletari eta nik ea maleta kontuz erabil zezaten adierazteko pegatina bereziren bat edo jartzerik ba al zuten galdetu nion (“kontuz ibili” edo “Fragil” bezelakoren bat)… 15 litro garagardo ditut… “Bai! Frágil dioen pegatina baina hau jarrita maleta H zonako beste toki batetara eraman beharko duzu, horrela izendatzen diren maletak ez baitira normalekin batera joaten” esan zuen.

“OK!” esan nion eta haruntz habiatu nintzen… bidean nioala zera pentsatu nuen… “Nik iada maleta fakturatuta dagoela dioen pegatina dut maletan, hortaz berriz botilak barrura sartu ezkero ez dira konturatuko, pisua berez fakturatze momentuan begiratu baitute…”

Horrelaxe egin nuen eta… Yeahh!! Premio!! “Frágil” maletak jasotzen dituzten tokian barruan dagoena zer den besterik ez dute ikusten (edo behintzat horrela izan zen nire kasuan), eta ez dute pisua berriz begiratzen.

Askotan bezeroei ordaintzea tokatzen zaigu bata ez bada besteagatik hegazkin konpainietan… oraingoan zorionez ez da hala izan!!

BERRIAK: “Herrira”k antolatutako garagardo festa Beasainen (Urriak 18-21)

2012(e)ko urriak 17-n igor-kargitaratuta

Goierriko Herrira taldeak garagardo festa antolatu du astebukaera honetarako Beasainen (Urriak 18,19,20 eta 21). Guztira 30 garagardo izango dira eta ohitura den bezala, bazkaltzeko edo afaltzeko aukera izango da. Lortzen den dirua sakabanaketak eta espetxe politikak eragindako gastuak arintzeko erabiliko da.

Ordutegia: 18:00 – 01:00

Kokalekua: Udaletxe azpiko portxeetan (Beasain)

Eskainiko diren garagardoak (3,5 euro bakoitzak eta 1,5 euro pitxarrak):

– Guiness ( Stout ,Irlanda) – Murphy´s (Stout, Irlanda)

– Paulaner Original (Münchner Hell, Alemania) – Paulaner Heffe (Garizkoa, Alemania)

– Leffe Blond (Abadiakoa, Belgika ) – Leffe Bruin ( Abadiakoa, Belgika)

– Leffe Trippel (Abadiakoa, Belgika) – Hoegarden (Belgikako garizkoa)

– Reserva especial 1906 (Estrella Gacilia) – Einsiedler Landbier (Landbier ,Alemania)

– Einsiedler Weissbier (Garizkoa, Alemania) – Budejovicky (Pilsen, Txek.Errepubl.)

– Budejovicky (Beltza, Txek.Errepubl.) – Pilsner Urquell (Pilsen, Txek. Errepubl.)

– La Trappe (Dubbel Trapista, Holanda) – La Trappe Tripel (Tripel trapista, Holanda)

– Löwenbrau ( Pilsen, Alemania) – Spaten München (Premium Lager, Alemania)

– Hasseröder (Premium Pilsner, Alemania) – John Martin´s Pale Ale (Pale Ale, Belgika)

– Kwak (Anbar estiloa, Belgika) – Bravante Oro (Abadia blond estiloa, Espainia)

– Trippel Karmeliet (Strong Pale Ale, Belgika) – Weihenstephaner Heffe (Garizkoa)

– Weihenstephaner Dunkel (Garizko iluna, Alemania) – Weihenstephaner (Festbier,)

– Krombacher Pils eta garizkoa (Alemania) – Buckler SIN (Alkoholik gabekoa)

Nik John Martin´s Pale Ale, Kwak, Trippel Karmeliet, Weihenstephaner Dunkel eta Bravante oro (oraindik ez dut dastatu eta) garagardoak edango ditudala uste dut, agian Murphy´s-a ere probatuz.

Kwak garagardoa bere edalontzi bereziak egin du oso famatu. % 8,4 alkohol bol. duen belgikako azaleko hartziduraz ekoizturiko Anbar estiloko garagardoa. Karamelu eta malta usainak nabariak dira.

Tripel Karmeliet azaleko hartziduraz ekoizturiko “Strong Pale Ale” bat da (% 8,4 alkohol bol.). Izena, azukre iturri bezala erabiltzen diren 3 zerealei (garagarra, garia eta oloa) eta jasandako hartzidurei zor zaie. Zitriko, malta gozo eta banilla usainak bereizi daitezke.

Weihenstephaner Dunkel % 5,3 alkohol bol. duen garizko garagardo ilunago bat da. Estilo honetan munich maltaren erabilerak eragin handia du garagardoan, banilla eta platanoa ere nabariak direlarik.

Garagardo desberdinak edatean, garagardo suabe edo neutroenetatik hasi, eta fuerteago eta usaintsuagoak direnak ondoren edatea gomendatzen da, alderantziz egin ezkero, ahoan eta sudurrean geratzen diren usain fuerteagoek garagardo suabegoen ezaugarriak bereiztea zailtzen baitu. Krombacher bat lehendabizi, Weihenstephaner Dunkel bat ondoren, eta bukatzeko Kwak bat edanez adibidez.

Alkohol kopuru handiko garagardo desberdin asko dagoenez, kontuz edatea gomendatzen da. Biharamuna gutxitu edo sahiesteko, blogean eman genituen aholkuak kontutan hartzea ere aholkatzen dizuegu.

Eskainiko den janaria:

– Ukondoa (12 euro) – “Brava”-k (2,5 euro)

– Saltxitxak (5 euro) – Postrea (3 euro)

Menua hartu ezkero (Ukondoa, saltxitxak, bravak, 2 postre eta 2 garagardo) 25 euro.

Hona hemen festa aurkezteko egin duten bideoa:

[youtube]http://www.youtube.com/watch?feature=player_embedded&v=88Kg0BG-JEU#![/youtube]

Mila esker Hirune pasatako informazioagatik!

GARALOTZA

2012(e)ko urriak 11-n igor-kargitaratuta

Garalotza beratze prozesuan azukre, proteina etab. disolbatzea lortu eta iragazpen prozesuaren ondoren azpiproduktu bezala lortzen den malta azal eta zati solidoek osatzen duten.

Iragazpen kupeletik garalotza ateratzen

Hau da, iragazpenean alde batetik muztioa lortuko da (likidoa) eta garalotza (solidoa) bestetik. Nahiz eta garalotza garagardo ekoizpenean azpiproduktu bat izan, nekazaritzarako eta beste sektore batzuetarako erabilgarri suertatzen da, horrela, garagardo ekoizpenerako erabilgarri ez den azpiproduktu bati beste erabilera jasangarri bat emanez.