Aurreko larunbatean Madrilgo Kako, Graciella eta Karlitros “El Drogas” ikustera etorri ziren Londresera eta bazkaldu ondoren The Botanist mirkrogaragardotegitik pasa ginen garagardo batzuk hartzera.

Kokalekua: 3-5 Kew green, Kew  TW9 3AA (Londres, Ingalaterra)

Duela urte bete bakarrik da martxan jarri dela mikrogaragardotegia eta bertara garagardo bat edatera zein bazkaldu edo afaltzera ere joateko aukera dago. Iada kanpotik ikus daiteke garagardoa ekoizteko erabiltzen dituzten beratze, egosketa zein hatzidura kupelak. Toki oso argitsua da, sarrera oso altu bat duena eta sartu bezain laster bertan ekoiztutako garagardoen “grifoak” (cask ale garagardoak zerbitzatzen dituztenak) aurkitzen dituzu aurrez aurre, malta desberdinak zein lupulu motak ikusgai dituen “kristalezko” mahai baten ondoan.

Makinaria txikia baina txukuna dute. Beratze kupela, iragazpen kupela, egosketa kupela eta 4 hartzidura ontzi itxiak. Zazpi egunez edukitzen dute garagardoa hartzidura ontzietan eta ondoren “cask” kupeletan jartzen dute, bertan egonkortu eta bertatiz zerbitzatzeko.

Urte osoan zehar 12 garagardo desberdin ekoiztu dituzte orain arte baina gu egon ginenean 6 zituzten:

– Humulus lupulus (%3,8) ko Ingalaterrako Pale Ale estilokoa  – OK Bitter (%4,2)

– 65 Mild (%3,4)                                                                         – Nemophilla Stout (%4,7)

– Maximus (% 5,8) ale gorria                                                    – Amarillo (%4)

Beraiek ekoizturiko garagardoez gain oineko hartziduraz ekoizturiko garagardo komertzialak ere eskaintzen dituzte (Konig Pilsner, Bitburger, Kostritzer beltza) eta Asahi japoniarra)  azaleko hartziduraz ekoizturiko garizkoa (Benediktiner weissbier).

Guk bertan ekoiztutako garagardo guztiak hartu genituen probatzeko, eta ondoren, nire kasuan Amarillo garagardoa izan zen beste bitan eskatu nuena bertatik joan aurretik. Bertan gehien gustatu zitzaidana, Amarillo garagardoaz gain, garagardoak taberna eta jatetxeko ia txoko gehienetan duen presentzia da, lupulua, malta,  bertan ekoiztutako garagardoen deskribapenak zein ekoizpen prozesuaren eskemak nonahi ikusi daitezke (makinaria erabat ikusgai egoteaz gain noski!) . Garagardoaren prozesua, makinaria zein lehengaiak jendeari gerturatzen dizkiotela da zoragarria alegia! Garagardo komertzialak eskaintzearenak ordea ez ninduen gehiegi liluratu…

Londresen egon ezkero, Kew Gardens-en parke botanikoa bisitatuz inguru hartan goiza edo arratsaldea pasatzeko aitzakia ona da dudarik gabe.
Kako eta Karlitrosek agurtzen zaituztete gaurkoan:

Joan den ostiralean garagardo jaialdi batetatik etxera itzuli nintzenean argazki makina hartu eta etxean dekorazio moduan dudan lupulu landareari argazki batzuk ateratzen hasi nintzen.

Duela denbora dexente alkohol intoxikazio txikiak sormena hobetzen duela komentatu genuen blogean, ez dakit honek eraginik izan zuen edo ez baina kontua da argazki makinarekin jolasteko gogoa izan nuela (kamara digital normal bat besterik ez dut).

Hona hemen emaitza :

Joan den ostiralean Londresko pub batetan ospatzen zen artisau garagardo jaialdi batetara joan nintzen. Gehienbat “cask“-etan zerbitzatzen ziren garagardoak zituzten baina kupel normalak eta botilaren bat ere bazituzten.

 Arratsalde-gau oso interesgarria izan zen, garagardoak zein bertako giroa paregabeak izan baitziren.

Ingalaterrako enpresen garagardoak zeuden gehienbat baina atzerrikoren bat ere aurkitzeko aukera izan nuen.

Ingalaterran garagardo bat eskatu aurretik probatzeko aukera ematen dizute, hori aprobetxatuz eta “zurito” tamainako garagardoak eskatuz, hamaika garagardo desberdin dastatzeko aukera izan nuen, % 2,8 eta % 8,3 alkohol bolumenean bitarteko garagardoak:

– Four (%4) Freedom Brewery                    – Table Beer (%2,8) The Kernel

– Raging Bitch (%8,3) Flying Dog                – Incubus (%4) Hopdaemon

– Shipwreck IPA (%6,5) Liverpool Organic   – Draft (%3,9) Marble

– Revival (% 3,8) Moor Beer                          – Hoppinness (%6,5) Moor Beer

– Old Freddie Walker (%7,3) Moor Beer       – Vluur & Vlam (%7,2) Marble

– Imperial Russian Stout (%7,9)

Garagardo potente dexente daude dastatu ditudanen artean, baina 3 azpimarratuko nituzke:

The Kernel enpresaren Table Beer, %2,8 alkohol bolumenean bakarrik du baina etiketan begiratu ezean sekula pentsatuko ez zenuen datua da. Cascade eta Stella lupuluak erabili dituzte,  dry-hopping -arekin baita, usain zoragarri eta bereizgarriak emanez. Nahiz eta beraien beste garagardoekin alderatuz hau ez hain orekatua izan (% 2,8-ko garagardo bat dela ezin ahaztu!!!), ahoan sakontasun pixka bat falta zaiola nabari baitzaio, benetan oso garagardo interesgarria iruditzen zait.

Old Freddie Walker (%7,3) porter garagardoa, txokolate eta kafe usainak, duen alkohol kopuru altua kontutan hartuta hau ez da hainbeste nabari, oso errez edaten da eta bukaera garbia du.

Eta bukatzeko Marble enpresaren Draft (%3,9), alkohol gutxi, usain eta zapore festa, garagardo orekatu eta oso sendo bat izanik.

Jaialditik etxera joan nintzenean egindakoak elkarbanatuko ditut bihar zuekin! 😉

Atzoko garagardo etiketaren istorioa ulertu al zenuten? Eta pertsonaia nagusiak nortzuk ziren?

Atzo zuekin elkarbanatu nuen argazkia (behean ikusi dezakezu berriz) Londons Fields Brewery garagardo enpresaren Shrodetich Triangle IPA garagardoaren etiketan ikusi daiteke. Garagardo hau egiteko erabili diren lehengaiak zein diren azaltzeko modu interesgarria iruditu zitzaidan eta horregatik jarri nuen blogean.

Egun bat izan duzue zuen kabuz istorioko pertsonaiak nortzuk diren jakiteko eta zuetako batzuek jakingo duzue zihurraski zein 3 zereal eta 3 lupulu erabili diren garagardo hau egiteko, baina istorioko pertsonaia guztiak ezagutzen ez dituzuenontzat:

“Barley” garagarra, “oat” oloa eta “wheat” garia dira azukre iturri bezala erabili diren 3 zerealak.

“Chinook“, “Centennial” eta “Columbus” Amerikar Pale Ale eta IPA garagardoetan maiztasun handiz erabili ohi diren lupuluak dira.

“Shoreditch” Londresko auzo bat da.

Hau jakinda, istorioa berriro irakurri eta ea gehiago ulertzen duzuen. Berriz irakurri eta oraindik ulertzen ez baduzue, etiketak dioena egin beharko duzue, garagardoa edan (istorioaren bertsio luzea jakiteko).