Ni ere harrituta gelditu nintzen honen berri jakitean, baina hala da, Alemaniako Munich hiriburuko aireportuan bertan eginiko garagardoa edateko aukera dago, hau da, terminalen artean Airbräu izeneko garagardo lantegi edo “mikro” bezala ezagutzen diren garagardo ekoizpen toki bat dago.

Bertara inguratu ezkero, ekoizpen prozesuan erabiltzen diren kobre koloreko  beratze eta iragazpen kupelak ikusi daitezke jangelan bertan. Bertan egindako garagardoak edateaz gainera, bazkaldu edo afaltzen ematen dute.

Hiru garagardo desberdin egiten dituzte urtean zehar (garizko bat, pils bat eta beste hori bat) eta sasoiko beste 5 garagardo desberdin garaiaren arabera (Doppelbock, garizko ilun bat, neguko iluna, festbier eta udako garizko garagardo suabe eta freskagarria).

Garagardoa etxera eramatea dago (ordainduta noski…) 5 l.-ko kupel txiki edo 1 eta 2 l.-ko botiletan.

Horrelako aireportu batean xamurragoa egingo litzateke hegazkinaren atzerapena ezta?

Pils izena Pilsen izenetik dator, Alemaniako garagardo ekoizleak hasi ziren Pils terminoa erabiltzen Txekiar Errepublikako Pilsen hiriko garagardoekin ez nahasteko asmoarekin.

Txekiar Errepublikako garagardo ekoizleak hauzitara joan ziren Pilsen terminoa jatorrizko izendapen bezala kontsidera zedin. 1913. urtean Kolonia-ko (Alemania) hauzitegi gorenak Pilsen terminoa jatorrizko izendapen bat baino, estilo bati erreferentzia egiten zion termino bat zela adierazi zuen, garai horretan garagardo mota honen ekoizpena herrialde desberdinetan ematen baitzen.

Hauzitegi honek bestalde, alemaniar garagardo ekoizleei Pilsen izenaren ondoren garagardoa non ekoiztua izan zen jartzeko eskatu zien, Pilsen herrian ekoizten zirenekin ez nahastearren.

Arazoak gutxitzeko, hasieran esan dugun bezala, Pilsen terminoa ordez Pils terminoa erabiltzen hasi ziren Alemanian.

Hemen aurkezten den marrazkia garagardo eta malta ekoizleen intsignia da. Garagardoa egiteko lehengai batzuk (garagarra eta lupulu landarea) eta makinaria zein lan tresnak ageri dira (Beratze kupela, malteroen endaia, beratze goilara…).

Ondoren ikusi dezakezuen marrazkia Galesko garagardo fabrika txiki batean garagardo maisu bezala lanean dabilen Alemaniako neska batena da. Manga marrazkiak egitea afizio du neska honek. Bitxia iruditu zitzaidan garagardo ekoizleen insigniaren bertsio hau eta blogean partekatzea erabaki dut. Argazkian ez da nabari baina dimentsio desberdinetako marrazki bat da. Ideia nondik etorri zitzaion galdetzean hau erantzun zidan berak:

“Komiki bat marrazteko asmoa nuen neska honekin, baina zoritxarrez ideia ez zen errealitate bilakatu. Nire lana inspirazio iturri harturik,  neska marrazten hasi nintzen, baina ez zitzaidanez atzekaldea gustatzen, neska moztea erabaki nuen, eta hasieratik hastea. Hortaz berriz hasi nintzen garagarra, lupulua etab. marrazten. Atzekaldea beltza nahi nuela konturatu nintzen, horregatik dena berriz moztea erabaki nuen kartulina beltz batean itsasteko. Sakontasun pixka bat irabazi zezan kapa desberdinak jarri nituen. Marrazkia azken finean niretzako ariketa txiki bat izan zen”